موعدنا أختلف بقلم الشاعر جبار الشمري
موعدنا أختلف وتصير عادي أهواي
عفتك كثر ما آني أشتهيتك
أبد لتگول عافاني وتناساني
أنة الهل لحظة صدگ مانسيتك
ظرف صادف وكلشي عذرة وياه
ولهذا السبب آسف ما أجيتك
نار الحرگتك يوم البيها أتنيت
شبت بية لو يمك چويتك
أحس تناطر وصارت مسيت أغروب
عميت عيني عليك من أخريتك
ماظلي وجه حتة أگدر أكشخ بيه
ساعات أنچبد ما ورچيتك
خفت تشوفني وأشلون مصيوب
شضمن يا جرح يبرة بثنيتك
قارنتك بدنيا شگد لگيت أعزاز
ولا منهم معزتك بس لگيتك
تركتك بس أحبك وبيك هيمان
عشگت آنة السواتر هوة بريتك
تترجاني أجيك ونشبگ الأحضان
لون تدري آنة ساعتها شريجيتك
لا متشوفني لن فاگد الذرعان
أخاف تسلم وتختلف نيتك
إلك أجرك يحبي الوطن هم يريد
بلا متضحي ما توصل ضحيتك
شفت عباس يوم الطاحن الچفين
طلع بس الوفة الينصر قضيتك
ما مرتاح گلبي وأنتة عني بعيد
ولا يرتاح لوما راح بيتك
صحيح أتبترت بس أمنت بيبان
تنام بكل دفو ما فززيتك
أعذرني يا ولفي لأن ما جيت
الوطن ناداني ما أحمل خطيتك
رضيتك بالوداع تعيش مهيوب
ولا معيوب أرضى آنة بشكيتك
الوطن غالي بغلاتك يا شريچ الروح
ردتك تبقى بعيوني فديتك
بعت العندي وبأبهض ثمن مدفوع
وشگد يرخص إلك لني أشتريتك.
