شهر الصيام محلاه بقلم الشاعر د.مختار هلال
محلى قدوم رمضان.......بالرحمة والغفران
شهر الكرم والجود............والبر والإحسان
شهر الصيام محلاه................الله عليه الله
رب الوجود عظمه..........فوق الشهور علاه
رؤيا الهلال اليوم........والناس مناها تصوم
تستنى طبله تدور........ع الدور وكله يقوم
هل الهلال بالخير..........أغلى حبيب وبشير
فيه القلوب تنتشى..... ...من فرحها هتطير
الزينه فوق الدور...........وف كل شارع نور
كل الخصام ننساه..........ونروح لبعض نزور
فى كل بيت فرحه.......شجرة حنان طارحه
ساعة الفطار لمه........ ....رغم الزحام برحه
رمضان يا وش الخير....فيك الصيام تطهير
كفاره للصايمين ..........من كل ذنب كبير
فرحه ف كل مكان............ومساجد الرحمن
بيلالى فوقها النور................عمرانه بالقرآن
وحوى العيال غنت. ...بالشوق ياما استنت
قايدين فوانسهم. ...........وقلوبهم اتهنت
يارب دى حكمتك ........فارد جناح رحمتك
قافل بيبان النار.....................فاتح لنا جنتك
بتذكر الغافلين..............ومسلسل الشياطين
فاتح بيبان الخير..............والتوبة للعاصيين
يا شهر كلك نور .... ..الكل فيك مسرور
ان كان فقير أو غنى. . ..الكل فيك مجبور
فيك الفقير فرحان.................بمواءد الرحمن
مطرح ما يمشى الخير......يلقاه ف كل مكان
الخير كتير موجود...........من عند رب الجود
ان كان لحوم أو فول.شاكرين على الموجود
...................................
عينى عليك يايميش .....نافش علينا الريش
أشكال على ألوان......بس المعامله ...مافيش
عين الجمل والجوز.......وقراصيا حلوه ولوز
اللى اشترى فرحان........وانا اللى ضارب بوز
بحلق عنيك بحلق....................برق قوى برق
ع السعر ماتبصش....................هتبصله تعرق
غمض عنيك واحلم.............حلم الفقير بلسم
قشر كتير واكبش................فى الحلم واتنعم
...................................... ... .
فيه ناس كتير رايقين.....وناس كتير واقعين
تأكل بلح مبلول. ......من غير زبيب ولا تين
ع الفقر أنا صابر..................راضى أنا وشاكر
بالصحه والإيمان.............مبسوط على الآخر
................................... ...
يامسحراتى قول.............ع الطبله والأرغول
ما باقى غير الله............. كل الوجود هيزول
يا نايم اصحى وقوم.......خليك خفيف النوم
كل اللى فوق الأرض.......فانى ومش هيدوم
قوم للسحور والفجر.... ...تلقى عظيم الأجر
تفضل ف حفظ الله.... ..ولتانى يوم الفجر
الفجر فضله أكيد............وصلاته أجمل عيد
فى القبر نور تلقاه..........فوق الصراط بيقيد
يا صاحب الملايين.....إعطف على المساكين
ارحم عشان يرحمك.......ربك فى يوم الدين
جايلك يا ظالم يوم....ماتشوفشى فيه النوم
مافى حجاب يمنعك...........يا دعوة المظلوم
واللى بيعمل خير...........لو حتى يبقى يسير
عند الكريم ما يضيع............تلقاه ثوابه كبير
................................................
الليله ليلة القدر.................فيها القيام للفجر
ما يوفيهاش حسنات.......لو ألف شهر وشهر
يارب يوم العيد خليه علينا سعيد
وتعيده بالأفراح ...........على أمة التوحيد
ليست هناك تعليقات:
إرسال تعليق