صباح الفل يا خال بقلم الشاعر محمد احمد حسن
عايش حياتك يا بطل
وراضى بالاحوال
لا شكيت فيوم دنيتك
ولا مديت اديك بسؤال
الضحكه حلوه اوى
لايقه عليك يا خال
لا عمرك دخلت الفيس
ولا كان معاك جوال
تمللى رضاك مبدأك
حتى ان لبست شوال
ومعاك مراتك عسل
شايله معاك احمال
تاكلها معاك بالملح
وكفايه راحة البال
لو فيوم تضيع صحتك
هيفيد بايه المال
اضحك ولعلع اوى
غنى متين موال
يا صاحب البخت ..
بختك فى يوم لو مال
ارفعه ايديك للسما
ادعى وقول ياااااارب
عمره ما رد سؤال
وكفايه عليك يا جدع
الحب والإخلاص
الضحكه منها تكفى
فيها دفا واحساس
وصونها دايما وشيلها
فى القلب.. فوق الراس
بنت الاصول لو تصح
بتبقى ست الناس
وكفايه نايم فى ليلك
لا سلاح ولا حراس
والله شكلك عاجبنى
تستاهل يا واد تتباس
ليست هناك تعليقات:
إرسال تعليق